BASEL OONI HAASE
E Helge zaigt e Buebeziigli, wo in finschtrer Nacht
Bim Gässle vor em Château Lapin ainsam Fasnacht macht.
En Alti luegt zem Fänschter uus, si wott jetz ändlig Rue
Und d Baiz ligt ganz im Dunggel, offesichtlig isch si zue.
Das het der Niggi Steggli gmoolt, vor iber nynzig Joor
Und ainewäg kunnt uns die Szene fascht prophetisch vor.
Schynt s nit, me gsääch der Fasnacht iiri Zuekunft uf däm Bild?
Nyt isch, mer mache jetz e Themewäggsel: Alles halb so wild!
Kenne Sii der Oschterhaas? Mir mache grad e Wett,
Ass jede, wo jetz schreyt: „He joo!“, no nie ain droffe het.
Und frogt me, ob das frindlig Dier au kennt e Kingel syy,
Denn git s e Riisediskussion. Mir mischen is nid yy.
Haas und Kingel sin nid s glyych, dasch allgemain bekannt.
Doch bi alle Unterschiid: die baide sin verwandt.
Waiche Pelz und scharfi Zeen e flyssig Schnuppernääsli
Kurzes Schwänzli, langi Bai hänn d Kingeli wie d Hääsli.
D Aigenart vo däne zwai, kennt mänge nit so gnau.
Baidi renne gschwind und langi Oore hän si au.
„Das hett jo“, rieft der Obmaa gstresst, „ mit Fasnacht gar nyt z due.
Drum leend mit eyrem Haasezyyg mi gopfridstutz in Rue!
Mir sotten is vo Politik und Stadtgschicht sich lo beriere;
Drum gang y morn ins Staatsarchiv go Dokumänt studiere.“
Und scho am näggschte Vormidaag baant d Sensation sich aa.
Der Obmaa schrybt em Dichter stolz: „Lueg was y gfunde ha!
In Basel gits e glaini Strooss, si haisst der Haasebärg,
Dert stoot e Kalkstaibrunnedroog, e bsunders brächtig Wärgg,
Und uf em Stogg hoggt stolz e Haas, us Bronzen isch er gosse,
E Louis Buurget haig en gmacht; sunscht haig dä Haase gschosse.
Grad dert, wo sälle Brunne stoot, und bis an Birsig unde
Syg s Landguet gsi Zer Haaseburg, das isch scho lang verschwunde.“
Da sältsam Namme irritiert: E Burg baut sich kai Haas.
Dä macht sich, wenn der Fuchs kunnt, glai und druggt sich still ins Gras.
„Im Mittelalter het s no mee so Haaseburge gä,“
Hett unsre Obmaa kenne alte Dokumänt entnää.
„Am Haibärg, in der Dalbe, in der Aesche, lengscht vergässe,
Het s Hyyser gää, die haigen au dä gschpässig Namme bsässe.
Und fascht sit siibehundert Joor“, so fasst er denne zämme,
„Git s in der Schnyydergass e Huus, das drait sogar vier Nämme:
Uff Hochdytsch liist me, Hasenburg, Franzeesisch Kingelschloss:
Le Château Lapin, ganz korräggt“ erklärt der Cliqueboss.
„Uf Baseldytsch haisst s Haaseburg, mir saagen aifach d Haase,
Au wenn dert eender grieni Hind als Haase duureraase.“
E jede waiss, ass d Haase näbem Imbergässli stoot,
Z mitts in der Stadt, grad dert, wo s Härz vo unsrer Fasnacht schloot.
Vyyl Joor isch d Haase als Lokal fir alli Gsellschaftsschichte
Beriehmt gsi z Basel fir Skandal- und andri Raibergschichte.
Bizyte het der Schaggi dert si erschte Bächer gläärt,
Bevor er denn an d Arbet isch am Gmiesstand uf em Märt.
Zem Znyyni gseet me d Stroossewischer gschwind e Groosses schnabbe,
Bim ballon d’ Algérie d Studänte mit und ooni Kappe.
Und wenn s vom Roothuus Zwelfi schloot, wott kain zem Ässe z schpoot syy
Ob Grampfer ob Regierigsroot, ob Liberal ob Sozi.
Und fascht an jedem Oobe het sich d Kinschtlerszene droffe.
S isch graaglet voll, me diskutiert, me lacht und alli hoffe,
Dass alles ändlig besseret, entwirft e neyi Wält,
Mit schwärer Zunge, grossem Durscht und zimlig weeni Gäld.
Nadyrlig rauchen ooni Filter alli Gauloises blau
Mit gääle Finger, gääle Zeen und d Luft isch digg und grau.
Me bschtellt e Liter Roote z viert, drzue e Wurschtsalat, garniert.
Glyy isch me driber informiert, was alles uf der Wält passiert.
Der Wirt het d Lääberli tranchiert, die beschti Reeschti produziert,
Sy Frau het d Bschtellige notiert, het au e bitzli intrigiert,
Mit Flyss serviert, drno kassiert, kurzum: die Spunte het rentiert.
Doch laider gits vo däm Lokal au iibli Sache z brichte:
Vo Spekulantetum, vo Gyt und dunggle, beese Gschichte,
Vo Striggverbott und vo Boykott, vo Grichtsfäll und Intrige.
Will mer jetz aber Fasnacht hänn, wänn mir do driber schwyyge.
Aber grad fir d Fasnacht drifft e schlimmi Nooricht yy.
D Haaseburg isch zue und wird s vilicht fir immer syy.
Aine git em andre d Schuld fir die verpfuschti Planig
Und me wirft enander vor, me haigi halt kai Aanig.
Het der Niggi Steggli mit sim Helge z letscht no rächt?
Denne stieng s um d Traditione z Basel eender schlächt!
Wotsch no n em Gässle ebbbis ässe
In der Haase? Kasch vergässe!
Loo der en Oschterai lo schmegge;
Scheeni Fasnacht, d Birewegge!