Fasnacht 2012
Sujet: Schnäller als Liecht? Das kaa nit syy! E modäärne Sindefall
Ladäärne: zaigt voorne: das kaa nit syy und hinde: das hämmer au scho kaa
Zuug: Mir sinn Alchemischte uff dr Suechi no Tachyonen, Neutrinos oder Hicks
in de dunggle Gasse vo dr Altstadt
SCHNÄLLER ALS LIECHT?
DAS KAA NIT SYY!
E modärne Sindefall
Der Lieb Gott het zem Adam gsait, do hesch e scheene Garte
Mit Gmies und Obscht im Iberfluss, mit Dier vo allen Arte
Darfsch s luschtig mit der Eva ha, yy misch mi doo nit dryy
Doch gscheyter welle syy als ych darfsch nie: das kaa nit syy!
Es goot kai Joor und d Menschhait keyt me us em Paradyys.
Zer Stroof fir d Iberhebligkait zaalt si e hooche Bryys.
Jetz wisse d Eva und der Adam, dass vo allen Affe
Mit Abstand si die schlauschte sinn, drfir mien si go schaffe.
Im Huus zem Sässel, bi s Frobens, am Dootegässli drey
Im Käller vo der Amerbach‘sche Biecherdruggerey
Gseet me der Doggter Paracelsus schaffe Nacht fir Nacht
Bewyyst, dass numme d Dosis d Wirggig vo de Gift uusmacht.
In Ärde, Wasser, Luft und Fyyr und in der Quintessänz
Suecht är no Mittel gege Hueschte, Gicht und Peschtillänz
Er git vyyl mee uffs sälber Forsche als uf alti Schrifte
Doch laider kääm s au vor, dass är Patiänte däät vergifte.
D Kollege an der Uni hänn dä Fyysigugger ghasst
Und au em Root vo Basel het dä frey Gaischt nit so basst.
Drum ziet er furt vo Basel, däre scheene Stadt am Rhy
Wil do bis hitte d Mainig herrscht, z vyyl Freyhait deerf nit syy.
Der Galilei sait z Floränz, me miesi alles mässe.
So wott är d Wält verstoo, är isch uffs Mässe ganz versässe.
E Fäärnroor het er sälber gmacht und het dermit entdeggt
Dass d Ärde jedes Joor aimool um d Sunne sich bewegt.
Grad die Erkenntnis bringt dä Maa in allergreschti Gfoor.
Won är sich z Rom mues mälde, zaigt er stolz em Boopscht sy Roor.
Er sait em: «Iberzyg di sälber, lueg doch aifach dryy!»
Dä waigeret sich standhaft, wil s nyt git, wo nit darf syy.
Der Einstein het vor hundert Joor, präzis vor hundertsiibe
E grossi Theorie uffgschtellt und s Wältbild ganz ney gschriibe.
Das hämmer in der Schuel vernoo, zwoor mit e Bitz Verspeetig.
S isch kaine wirgglig noochekoo. Das syg au gar nit neetig!
Mer haige aifach d Formlee z leere, hett der Leerer gsait
Es gälti m mool c hoch zwai, in alli Ewigkait
Es kenn nyt schnäller syy als Liecht, das lyychti allen yy
Sunscht käm jo d Wirggig vor der Ursach und das kenn nit syy.
Im CERN-Labor, grad näbe Gämf, dief in der Ärden unde
Do draie glaini Daili als wie schnäller iri Runde.
Denn sändet me si sibehundert Kilometer wyt
Und misst grad wie bim Riiseslalom iri Aakumftszyt.
S Ergäbnis vo däm Grossversuch hett d Forscher dieff beriert.
Si hänn d Maschine iberprieft und s noonemool brobiert.
Und als wie mee stellt mit der Zyt sich d Iberzyygig yy
Es kenn vilicht doch ebbis schnäller als e Liechtstraal syy.
Die Sensation het wie e Lauffyyr d Rundi gmacht um d Ärde.
Me sait, jetz miese vyyli Biecher ganz ney gschribe wärde.
E Rais in fremdi Wälte schynt nimm ganz so futuristisch
Und d Wirggig vor der Ursach syg jetz zimlig realistisch.
Dass d Ursach no der der Wirggig kunnt, ka uns nit wyter steere
Am Billjeautomat hänn mir das au scho deerfe leere.
Zerscht mues me uff em Bildschirm, was me drugge soll, verstoo
Und wenn denn s Billjee uusekunnt, faart s Drämmli grad drvoo.
Au in der grosse Politik stimmt unser Wältbild nimme:
Der Putin isch scho Presidänt, vor d Russe derfe stimme.
Und z Basel zaigt der Morin s glyych, mir mache jedi Wett:
Dä änderet sy Standpunggt scho, bevor er aine het.
Me schwätzt vo Eichbotone, Quarks, Leptone und Myone
Vo Nukleone, Positrone, Higgs und vo Pione.
Jetz wisse mir efange nimm, was mir no solle dängge.
Mer kemme halt scho lang nimm druus – das kenne mir is schängge.
Au wenn is d Wisseschaftler unser Wältbild dien erschittere
Au wenn die halbi Wält mues vor der Wirtschaftgryyse zittere
Es git ai Gsetz vom Liecht, wo Lyt wie dir und mir begryffe:
Wenn s Liecht uusgoot, isch Morgeschtraich und mir feen afoo pfyffe.
Wenn de uf em Minschterplatz d Ladärne bewunderesch – das
ka me vom Mäntigzoobe bis am frieje Mittwuchmorge – ka s syy,
dass de der aint oder ander Alchemischt aadriffsch, wo sich bim
Gässle erlyychte loot.
Aber am Donnschtigmorge geen d Lambben uus. Vebass es nit!
nd wenn s di gluschtet, mit uns Fasnacht z mache, gang doch
emool bi http://www.birewegge.com/ go luege. Mer fraien ys!