FIR IMMER JUNG
DIE ALTE – VORWÄRTS –
MARSCH

Bau e Leitere zue de Stärne,
Nimm jedi Sprosse mit eme Sprung
Und bis und blyb fir immer jung.
(Bob Dylan/Polo Hofer)

Prolog 1963
Der Eddy Pauwels wärde Si nit kenne,
Er kunnt us Belgie, isch en alte Maa.
Doch syynerzyt, bim greschte Velorenne
Legt är als Erschte s gääli Lyybli aa.
Die Gschicht isch grad vor fuffzig Joor passiert,
Het absolut nyt mit der Fanacht z due.
Drum steert s is nit, wenn kain sich intressiert.
Mir wänden is Bedytenderem zu.

1963 zem Erschte
Vor fuffzig Joor, am zwelfte Jänner,
Z London ame Samschtig znacht,
Hänn säggs verruggti jungi Männer
S erscht mool zämme Muusig gmacht.
Mit zwai Gitarre, Bass und Gsang
Mit Schnuuregyyge, mit Klavier
Und Schlagzyyg spilt me stundelang
Fir fish and chips und lauwarm Bier.
Und iber Nacht gfallt iiri Muusig
De junge Lyt im ganze Land
Die Alte finde s eender gruusig
Und fir Britannie e Schand.
»In ai, zwai Joor«, so heersch die Alte schneede,
»Duet kain vo däne Rolling Stones mee rede.«

1963 zem Zwaite
Zer glyyche Zyt, vor fuffzig Joor,
Hänn z Basel, zwische Birs und Rhy,
Zwai glaini Buebe Grosses vor:
Si wänn e Fasnachtsclique sy.
Si bauen e Ladärnegstell,
Wo me sogar belyychte ka,
Und mälde sich denn offiziell
Bim Comité als Ziigli aa.
Jetz lueg au do: e Bitzli speeter,
E jede Basler wird s begryffe,
Ka ain vo baide – är haisst Peter –
Der Gluggsi und die Alte pfyffe.
»So glaini Gnäggis«, heersch die Alte lache,
»Die kenne jo nid richtig Fasnacht mache!«

1963 zem Dritte
Z Amerika rieft d Birgerrächtsbeweegig
Zwaihundertdausig Lyt zem Capitol
S mues ändlig ebbis gschee, isch d Iberleegig,
Und Martin Luther King haisst iir Idol.
Dä het e groossi Aasprooch vor de Masse:
E Draum vo Freyheit und vo Harmonyy
Und vo Verseenig zwischen alle Rasse.
Är zaigt e Bild, wie Friide kennti syy.
Drey Musikante singen iiri Lieder
Vo neye Zyten und vo frischem Wind
Si sage, alli Mentsche syyge Brieder
Und d Antwort liig scho in der Luft, my Frind.
Und wääred d Juuged iiri Helde fyyrt,
Isch mängem Alte glaar: »Die sin vo Moskau gstyyrt!«

1963 zem Vierte
Das kasch am Radio Berominschter heere
Und, wär ains het, ka s au am Fäärnse gsee,
Doch leen sich d Basler nit so gärn beleere,
Denn iiri Helde sinn bim FCB.
Dä gwinnt der Cupfinal im Wankdorf z Bärn.
GC verliert, es frait die ganzi Stadt
Und näbe Kuenz und Michaud gseet me gärn
Im Mittelfäld der Karli Odermatt.
Und wider heersch die Alte lamentiere:
»Die Junge kennte sich fir Gscheyters engagiere!«

E baar Joor speeter
Im Cliquekäller wärde Nacht fir Nacht,
Wo s niechtelet no Rauch und Dalbedyych,
Ladärne gmoolt und Larve sälber gmacht
Mit yysigkalte Fiess, doch isch das glyych.
Die glaini Cliquen isch jetz seer politisch
Stundelang wird yyfrig diskutiert.
Me luegt in d Zuekumft, und will s an der Zyt isch,
Hänn d Pfyffer mit zwai Drummler fusioniert.
Si hänn mit Marx- und Ängelszunge
Vo Vietnam und Mao Tse Tung
Im gschitzten Umfäld Reede gschwunge.
S isch alle glaar: So blybt me jung!
Und wider mische sich die Alten yy:
»Das isch kai Fasnacht – das isch Anarchyy!«

Vyyl speeter: 2013
Jetz gheere mir scho lang nimm zue de Junge
Das mues me aifach realistisch gsee.
Der Rhyysprung hänn mer zwoor no jedes Joor bezwunge
Und dringge noni dääglig Ginsengtee.
Im Cliquekäller redt me vo Beschwärde,
Waiss, weeles Mitteli am beschte nutzt.
Me frogt sich, ob me glyy sott Räntner wärde,
Und wie me d Runzle wirggigsvoll verbutzt.
»Die Alte wänn in alte Zyte lääbe,«
Heert me die Junge jetze regglamiere
»Si blyyben an de Tradizioone glääbe,
Dien iiri glyyche Gschichte repetiere.«

Drum loss y jetze d Dichterey lo blyybe,
Die Cliquechronik liist jo doch kai Gnoche.
Au d Wältgschicht kan y hitte nimme schryybe,
Fir morn han y em Drugger Boscht versproche.
No s Sujet gschwind: Die Alte – vorwärts – marsch!
Gruess, d Birewegge, blooset mer in d Schue!

Fir immer jung … die Alte! Vorwärts, marsch!

Laterne Zaigt vorne: Sit 50 Joor fir immer jung
Und hinde: Die Alte – vorwärts, marsch!
Im Zug laufe:Die Alte.
À propos 50 Joor: der Whisky-Soda wird pfiffe und nid drummlet!